Museveni yakiriye intumwa idasanzwe ya Tshisekedi

Ku wa 13 Nyakanga 2026, Perezida wa Repubulika ya Demokarasi ya Congo Félix Tshisekedi yohereje Floribert Anzuluni Isiloketshi mu Uganda guhura na Perezida Yoweri Museveni, hagamijwe gushaka uburyo bwo gukomeza ubufatanye mu karere no gucyemura ibibazo by’umutekano mu Burasirazuba bwa Congo.

Perezida Félix Tshisekedi yohereje Floribert Anzuluni Isiloketshi, Minisitiri w’Ububanyi n’Amahanga n’Ubufatanye mu Karere, mu ruzinduko rwihariye mu Uganda. Yakiriwe na Perezida Yoweri Museveni, uyoboye EAC muri iki gihe.

Ibiganiro byibanze ku buryo ibihugu byo mu karere byakomeza ubufatanye mu gushaka amahoro, guhuza imbaraga mu biganiro bya politiki no mu nzira z’ubuhuza, hagamijwe kurangiza intambara z’urudaca mu Burasirazuba bwa RDC.

Impamvu y’uru ruzinduko
RDC irashaka ko ibihugu byo mu karere bifatanya mu gucyemura ibibazo by’umutekano. Hashyirwa mu bikorwa amasezerano y’amahoro yasinyiwe i Washington mu 2025 hagati ya Tshisekedi na Kagame. Kugira ngo abaturage b’Uburasirazuba bagire amahoro arambye.

Museveni yemeje ko yakiriye Anzuluni mu rugo rwe rwa Kisozi, avuga kuri X: “Uyu munsi mu gitondo nakiriye Floribert Anzuluni Isiloketshi, intumwa idasanzwe ya RDC. Twaganiriye ku bibazo by’umutekano mu Burasirazuba bwa RDC.”

Abasesenguzi bavuga ko uru ruzinduko rugaragaza ubushake bwa Kinshasa bwo gukomeza guhuza imbaraga n’ibihugu byo mu karere, cyane cyane Uganda ifite ijambo rikomeye mu muryango w’ibihugu by’uburasirazuba ndetse ikaba yarafatanyije na RDC mu kurwanya imitwe yitwaje intwaro mu Ituri no mu Kivu y’Amajyaruguru.