Igikombe cy’Isi kirangiye Infantino akoze ingendo zingana n’umuzenguruko w’Isi inshuro ebyiri
Perezida w’Ishyirahamwe ry’Umupira w’Amaguru ku Isi (FIFA), Gianni Infantino, amaze gukora ingendo zingana n’ibilometero 92.860, bingana no kuzenguruka Isi inshuro 2,3.
Kuri iki Cyumweru, tariki ya 19 Nyakanga 2026, ni bwo muri Leta Zunze Ubumwe za Amerika, hateganyijwe umukino wa nyuma w’Igikombe cy’Isi cya 2026, yakiriye ifatanyije na Mexique na Canada.
Gianni Infantino yifashishije indege ya Gulfstream G650ER, akurikira imbonankubone hafi ½ cy’imikino 104 yari iteganyijwe muri iri rushanwa.
Mbere y’uko haba umukino wa nyuma, uyu mugabo yari amaze gukora ingendo zingana n’ibilometero 92.860 yifashishije indege yahawe na Sosiyete y’Ingendo zo mu Kirere ya Qatar Airways.
Ikinyamakuru cya Bloomberg cyasesenguye ingendo z’uyu mugabo cyifashishije urubuga runyuraho amakuru y’ingendo z’indege rwa JetSpy, gisanga yarakoze ingendo zishobora kuba zirengeje umuzenguruko w’Isi inshuro zirenga ebyiri, dore ko ungana n’ibilometero 40.075.
Nta rugendo rureshya gutya rushobora gukorwa n’indege yo mu Rwanda, kuko ururerure zikora ari ibilometero 11.900, ruturuka i Kigali rujya i Sydney muri Australia.
Bisobanuye ko ingendo Infantino yakoze ari ukuva i Kigali werekeza i Sydney, inshuro enye.
Urugendo Infantino yakoze ari rurerure mu munsi umwe rureshya n’ibilometero 8.851,3. Yavuye kureba umukino wa Côte d’Ivoire na Curaçao muri Philadelphia, ajya i Miami kuruhuka, arahava ajya i Dallas gusura Ikipe y’Igihugu ya Jordanie, na ho ahava ajya Seattle mu mukino wa Misiri na Iran, ahavuye asubira i Miami kureba umukino wa Colombia na Portugal.
Bivugwa ko ingendo Infantino yakoze muri iri rushanwa ryatwaye arenga 350.000$ by’amavuta y’indege, zikanohereza toni zirenga 700 z’imyuka ihumanya ikirere.
Indi nkuru wasoma: Imiterere y’ndege y’akataraboneka ifasha Infantino gukurikirana Igikombe cy’Isi mu bihugu bitatu
About The Author
