Twibukiranye: Amateka avuga iki? Rayon Sport na Gor Mahia zongeye guhurira ku mukino wa nyuma
Rayon Sports na Gor Mahia: Amateka y’imikino yahuje ibi ibihangange byo mu Karere ka Afurika y’Iburasirazuba mbere y’umukino wa nyuma wa CECAFA Kagame Cup 2026
Mu gihe hasigaye amasaha make ngo Rayon Sports yo mu Rwanda itane mu mitwe na Gor Mahia yo muri Kenya ku mukino wa nyuma wa CECAFA Kagame Cup 2026 uzabera kuri Stade Amahoro ku wa 7 Kanama 2026, amateka agaragaza ko aya makipe yombi amaze imyaka myinshi ahurira mu marushanwa akomeye yo ku rwego rw’akarere n’umugabane wa Afurika.
Mu irushanwa rya CAF Confederation Cup 2018, Rayon Sports na Gor Mahia bahuriye mu Itsinda D barikumwe na USM Alger(Algeria) hamwe na Young Africans(Tanzania). Umukino ubanza wabereye i Kigali ku wa 6 Gicurasi 2018, urangira amakipe yombi anganya 1-1 , yatsindiwe na Meddie Kagere ku ruhande rwa Rayon Sports mu gihe icya Gor Mahia cyatsinzwe na Jacques Tuyisenge, wari kapiteni wa Gor Mahia icyo gihe, buri ruhande rwigaragaza nk’urufite ubushobozi bwo gukomeza mu kiciro gikurikiyeho.
Mu mukino wo kwishyura wabereye kuri Moi International Sports Centre Kasarani i Nairobi ku wa 19 Kanama 2018, Rayon Sports yatsinze Gor Mahia ibitego bya Muhire Kevin na Christophe Iradukunda 2-1, icya Gor Mahia gitsindwa na Francis Kahata icyo gihe Rayon Sports ihita ikomeza muri 1/4 cy’irangiza, mu gihe Gor Mahia yahise isezererwa. Icyo gihe Nyuma y’imikino itandatu:
USM Alger – amanota 11
Rayon Sports – amanota 9
Gor Mahia – amanota 9 (isigara inyuma ya Rayon Sports ku musaruro w’imikino yazihuje)
Young Africans – amanota 6
Nyuma y’imyaka umunani, aya makipe yongeye guhura mu mukino wa gicuti wa Rayon Day 2026, wabereye kuri Kigali Pelé Stadium muri Nyakanga 2026. Rayon Sports yitwaye neza itsinda Gor Mahia ibitego 2-0, uwo mukino ukaba wari umwe mu yo kwitegura CECAFA Kagame Cup 2026.
Uyu mwaka wa 2026 wongeye kubahuza mu irushanwa rya CECAFA Kagame Cup. Gor Mahia yageze ku mukino wa nyuma isezereye Al Hilal yo muri Sudani nyuma yo kunganya 1-1 mu minota 120, ikayitsinda 8-7 kuri penaliti. Rayon Sports na yo yageze ku mukino wa nyuma itsinze Jamus SC yo muri Sudani y’Epfo ibitego 3-1 muri 1/2 cy’irangiza. Ibi byahise bitegura umukino wa nyuma utegerejwe na benshi hagati y’ibi bihangange bibiri byo muri Afurika y’Iburasirazuba.
Amateka agaragaza ko Rayon Sports itaratsindwa na Gor Mahia. Ibi bituma umukino wa nyuma wa CECAFA Kagame Cup 2026 uteganyijwe kuwa 07 Kanama 2026 uzaba ufite amateka yihariye, aho Gor Mahia ishaka kwihimura ikanegukana CECAFA yayo ya 4 ikurikira izo yatwaye mu myaka ya1980,1981 na 1985 mu gihe Rayon Sports ishaka gukomeza kwerekana ubushongore n’ubukaka bwayo mu karere ndetse n’imbere y’abafana bayo no kongera kwegukana iki gikombe nyuma y’imyaka 28 itazi uko gisa.
About The Author
