Urukiko Rwisumbuye rwa Gasabo ku wa Kabiri, tariki ya 25 Gicurasi 2026, rwanze ubujurire bw’umunyamakuru Niyigaba Clement uzwi cyane nka DC Clement, rutegeka ko akomeza gukurikiranwa afunze by’agateganyo.
Mu mwanzuro warwo, urukiko rwavuze ko “ubujurire bwatanzwe na Niyigaba Clement nta shingiro bufite, bityo icyemezo cy’Urukiko rw’Ibanze rwa Gasabo cyafashwe tariki ya 30 Mata 2026 kidahindutse mu ngingo zacyo zose.”
DC Clement akurikiranyweho: Gukubita abayobozi cyangwa kubagirira urugomo
Kwangiza ibintu by’abandi
Kurwanya ububasha bw’amategeko
Guteza imvururu muri rubanda
Ku wa 27 Mata 2026, mu iburanisha, Niyigaba yemeye ibi byaha byose, anabisabira imbabazi, avuga ko yabitewe n’umujinya watewe no gusenya inyubako z’ishuri yari afatanyije n’undi kubaka, ibintu yabonaga nk’akarengane.
Urukiko rwasobanuye ko kwiyemerera ibyaha ari kimwe mu bimenyetso bikomeye bituma akomeza gukurikiranwa afunze.
Nta gihamya yatanze yerekana ko gufungwa kwe byagira ingaruka zikomeye ku muryango we, nubwo yagaragaje ko afite impanga aherutse kwibaruka n’umugore ufite ibibazo by’umugongo. Bityo, urukiko rwanzuye ko akomeza gufungwa mu gihe cy’iminsi 30 y’agateganyo.
Niyigaba Clement yatawe muri yombi ku wa 31 Werurwe 2026, nyuma yo gushyira ku rubuga nkoranyambaga rwa X amashusho agaragaza inyubako z’ishuri riherereye mu Murenge wa Jabana, Akarere ka Gasabo, avuga ko ziri gusenywa mu buryo yabonaga nk’akarengane.
